ඉඩම් සංවර්ධන ආඥා පනත යටතේ බැහැර කල ඉඩම් වල අවම බෙදුම් සීමාව සංශෝධනය කිරීම.
ශ්‍රී ලංකාව තුල ඉඩම් සංවර්ධන ආඥා පනත යටතේ ඉඩම් කැබලි මිලියන 1.2 පමණ ප්‍රමාණයක් සඳහා මේ වන විට දීමනාපත්‍ර නිකුත් කර ඇති අතර වර්තමාන සමාජ හා ආර්ථික අවශ්‍යතා පුළුල් වීමත් සමඟ දීමනාපත්‍රවල පසු කටයුතු සඳහා ලැබෙන ඉල්ලීම් ප්‍රමාණය වැඩිවීමක් සිදුවී ඇත.
අතුරු බෙදීම් සඳහා ඉඩ නොමැති ඉ:කො 143 ආකෘතියෙන් නිකුත් කර ඇති දීමනාපත්‍ර මෙන්ම අතුරු බෙදීමට ඉඩ ඇති ඉ:කො 142 ආකෘතියෙන් නිකුත් කර ඇති දීමනාපත්‍රවල මෙන්ම ඉ:කො 156 ආකෘතියෙන් නිකුත් කර ඇති දීමනාපත්‍රවලට
අයත් ඉඩම් III උපලේඛනගත ඥාතීන් නිවාස ඉදිකරගෙන හෝ සංවර්ධනය කරගෙන සිටින
අවස්ථාවක එම ඉඩම කොටස්කර ගැනීමට කරන ඉල්ලීම් හෝ දරුවන් කීපදෙනෙකු අතර
පසුඋරුමය නම්කිරීම සඳහා කරනු ලබන ඉල්ලීම් වලදී අවම බෙදුම් සිමා සංශෝධනය කර
දැනට පවතින පළාත් පාලන ආයතන අවම බෙදුම් සීමාවට අනුව සකස් කිරීමේදී දීමනාපත්‍රය රජයට භාරගෙන නව දීමනාපත්‍ර සකස් කිරීම සාමාන්‍ය ක්‍රියාවලිය ලෙස මෙතෙක් සිදුවිය.
නමුත් 2021 නව ඉඩම් සංවර්ධන රෙගුලාසි යටතේ ඉඩම් සංවර්ධන ආඥා පනත යටතේ ලබා දුන් ඉඩම් වල අවම බෙදුම් ඒකක සංශෝධනය කිරීමට ක්‍රියාකර ඇත.ඒ 2251/48 ඇති විශේෂ ගැසට් පත්‍රයේ පලකර ඇති ඉඩම් රෙගුලාසි හා එහි කාර්යන් සඳහා නිකුත් කල 2021/07 චක්‍රලේඛයට අනුවයි.
01. ගොඩ ඉඩම් - එම ඉඩම පිහිටි පළාත් පාලන බල ප්‍රදේශයේ අවම අනුබෙදුම් ඒකකය අනුව
02. මඩ ඉඩම් - අක්:01
03. වාණිජ භෝග සඳහා බැහැර කල ඉඩම් - අක්:01
04. මධ්‍යම පන්තික ඉඩම් - අක්: 2 ½
05. අහස් දියෙන් වගා කරන ගොඩ ඉඩම් - අක්:01
උක්ත අනුබෙදුම් සීමා අනුව අදාල දීමනාපත්‍ර හෝ බලපත්‍ර සහිත ඉඩමක එහි අවම බෙදුම් සිමා සංශෝධය කිරීමේ බලය ඉඩම් කොමසාරිස්වරයෙකුට, සහකාර ඉඩම් කොමසාරිස්වරයෙකුට හෝ ප්‍රාදේශීය ලේකම්වරයෙකු හට බලය ලබා දී ඇත. ඒ සඳහා ආකෘති පත්‍ර දෙකක් “අ” සහ “ආ” වශයෙන් ඉදිරිපත් කර ඇත.
බලපත්‍රයක අවම බෙදුම් සිමා සංශෝධනය සිදුකිරීමක් ලද හොත් අදාළ “අ” ආකෘතිය පුරවා ඉඩම් කොමසාරිස්වරයෙකුගේ, සහකාර ඉඩම් කොමසාරිස්වරයෙකුගේ හෝ ප්‍රාදේශීය ලේකම්වරයෙකුගේ අත්සන හා නිල මුද්‍රාව තබා බලපත්‍රකරුගේ අත්සනද ලබාගෙන බලපත්‍රයේ මුල් පිටපතට හා අනු පිටපතට එය අමුණා තැබිය යුතුය.
දීමනාපත්‍රයක නම් අදාළ “අ” ආකෘතිය පුරවා ඉඩම් කොමසාරිස්වරයෙකුගේ, සහකාර ඉඩම් කොමසාරිස්වරයෙකුගේ හෝ ප්‍රාදේශීය ලේකම්වරයෙකුගේ අත්සන හා නිල මුද්‍රාව තබා දීමනාපත්‍රකරුගේ අත්සනද ලබාගෙන දීමනාපත්‍රයේ අවසන් පිටුවේ අලවා දිස්ත්‍රික් ඉඩම් රෙජිස්ට්‍රාර් කාර්යාලයේ ලියාපදිංචි කල යුතුය.එම ලියාපදිංචි කල ලේඛනය අදාළ ගොනුවෙහි ගොනුගතකර තැබිය යුතුය.
දීමනාපත්‍රයකින්
විධිමත් ලෙස බැහැර කල ඉඩමකට සකස් කල අතුරු ඔප්පුවක අවම බෙදුම් සීමා සංශෝධය
කිරීමේදී “ආ” ආකෘතිය පුරවා ඉඩම් කොමසාරිස්වරයෙකුගේ, සහකාර ඉඩම්
කොමසාරිස්වරයෙකුගේ හෝ ප්‍රාදේශීය ලේකම්වරයෙකුගේ අත්සන හා නිල මුද්‍රාව තබා අතුරු ඔප්පුකරුගේ අත්සනද ලබාගෙන අතුරු ඔප්පුවේ හා අනු පිටපත්වල එය අමුණා දිස්ත්‍රික් ඉඩම් රෙජිස්ට්‍රාර් කාර්යාලයේ ලියාපදිංචි කල යුතුය.එම ලියාපදිංචි කල ලේඛනය අදාළ ගොනුවෙහි ගොනුගතකර තැබිය යුතුය.
මඩ ඉඩමක අවම බෙදුම් සීමා සංශෝධනය කිරීමට පෙර එම වාරි ඉඩමෙන් බෙදා වෙන් කරන සෑම ඉඩම් කොටසක් සඳහාම ස්වාධීන ජල සැපයුමක් හා ප්‍රවේශ
මාර්ගයක් ලබා දීමට කටයුතු කල යුතුය.ඒ සම්බන්ධයෙන් වාරිමාර්ග
දෙපාර්තමේන්තුවේ එකඟතාවයද ලබා ගත යුතුය.ඉන්පසු පෙරසේම “අ” අකෘතිය මගින් අවම
බෙදුම් සීමා සංශෝධනය කල හැක.
-චතුර තෙන්නකෝන්-